الجزاير (البواه) .. تعاونت رابطة الطلبة الصحراويين
اللي يقراو ف الجزاير مع اللجنة الجزائرية للتضامن مع الشعب الصحراوي اعلى تنظيم
يوم تضامني ف الجزاير العاصمة مع المعتقلين الصحراويين ف لحباس المغربية و خاصة
ذوك اللي لاهي يحاكمو الصبح محاكمة عسكرية اعلى سبت مشاركتهم ف تنظيم مخيم اكديم
ازيك شرق لعيون المحتلة 2010.
اليوم الدراس احظرو ياسر من الشخصيات
الجزايرية و الصحراوية و مجموعة لاباس بيها من الطلبة الصحراويين اللي يقراو فجامعات
الجزاير و المدن الثانية اللي اقريب منها و اللي ندو كاملين بذيك المحاكمة الجايرة
ف حق 24 معتقل سياسي صحراوي اعلى سبت ارايهم اللي مستعدين اعلنهم يستشهدو من اجلها
و ما يحيدو عنها هي حقهم ف الحياة الكريمة و الحرية و استقلال الصحراء الغربية.
و ف كلمة البداية اشكر الاخ رئيس اللجنة
الجزايرية للتضامن مع الشعب الصحراوي الحاظرين اعلى نجاحهم لهذا اليوم التضامني و
خص الشكر الطلبة الصحراويين اللي قال عنهم هوما " الشريان الاساسى فى استمرار
العملبة النضالية".
يغير رئيس الوفد الصحراوي والي ولاية لعيون
الاخ حمة البونية اتكلم عن تداعيات المحاكمة العسكرية اللي لاهي تعدل الصبح و اشكر
الشعب الجزايري اعلو مواقفو الثابتة مع الشعب الصحراوي "اشيد بالدور الجزائري
الذي ما فتئ يقف الى جانب الشعب الصحراوي في افراحه و اتراحه"، يقول المسول
الصحراوي.
و من زر ثاني كانت مشاركة فرع الشرق الجزائري
اعلى السان الامين العام لرابطة الطلبة الصحراويين ف الجزائر الاخ مولاي امحمد
ابراهيم اللي ظهر للحظور متن التعاطف و التازر الطلابي مع ابطال ملحمة اكديم ازيك و
قال اعلن "محاكمتهم العسكرية لاهي اتعود اشين افظاحة تنكتب اعلى لمغاربة بيه
ذا الاهي يعدلو متعاكس تماما مع القوانين و الشرايع الدولية ف الوقت اللي مزال
ياسر من العالم قابظ موقف اشوين حتى من ذا اللي خالق ف المدن المحتلة مكن الصحراء
الغربية".
و ف هذا اليوم الدراسي اتكلمت عرمة من
الشخصيات الصحراوية و الجزائرية و عبروا كاملين عن تضامنهم مع معتقلين اكديم ازيك
و منهم رئيسة مجموعة الصداقة البرلمانية الجزايرية
الصحراوية، رئيس بلدية الجزائر الوسطى، قائد الكشافة الجزائرية، رئيسة اتحاد
النساء الجزائريات، و اختم ذا كامل الاخ الصادق بوقطاية اللي قال " ان الشعب
الصحراوي لن يكون وحده في المقاومة مادام يوجد جزائريا واحدا على قيد الحياة في
هذه المعمورة".
و نختم البرنامج كامل بقراية بيان ختامي حرض
الجميع اعلنهم ما يبخلو شي يلين كانهم ينصروا المعتقلين السياسيين الصحراويين و
يفظحو السياسة المغربية اللي مزالت هي اكبر رمز للاستعمار و الاستبداد ف افريقيا.
0 التعليقات:
إرسال تعليق